ՀԱՅ ԱԶԳԱՅԻՆ ԿՈՆԳՐԵՍԻ ՀԱՅՏԱՐԱՐՈՒԹՅՈՒՆԸ ԳԱԶԻ ՄԱՆՐԱԾԱԽ ԳՆԵՐԻ ԲԱՐՁՐԱՑՄԱՆ ՄԱՍԻՆ

Ապրիլի 1-ից գազի գների աննախադեպ ու անհիմն բարձրացումը բնակչությանը դնում է անելանելի վիճակի մեջ։ Ակնհայտ է, որ այս էներգակրի թանկացումը իր հետ բերելու է նաեւ տասնյակ այլ ծառայությունների ու ապրանքների գների բարձրացման։ Դա կարող է վերջին կաթիլը լինել բնակչությանը մատնելու վերջնական սնանկացման, իսկ Հայաստանի տնտեսական անումը վերածել անկասելի փլուզման։ Հենվելով առկա իրողությունների եւ մասնագիտական ուսումնասիրությունների վրա՝ Հայ Ազգային Կոնգրեսը հայտարարում է.
1. Նկատի ունենալով դրամի փոխարժեքի փոփոխությունը՝ վերջին 5 տարիներին մատակարար կազմակերպություն «ՀայՌուսգազարդը» գազը ստացել է և ստանում է անփոփոխ 60 հազ դրամ մեծածախ գնով։ Ուստիեւ այդ ընթացքում գազի մանրածախ գնի մի քանի անգամ բարձրացումը ոչ մի հիմնավորում չունի եւ ուղղված է եղել միմիայն բնակչությանը կողոպտելու գնով մենաշնորհային գերշահույթների ապահովմանը։
2. Գազի գնի բարձրացման իրական հեղինակը ոչ թե «Հայռուսգազարդն» է, այլ ՀՀ կառավարությունը՝ «Հայռուսգազարդի» խոշորագույն բաժնետերերից մեկը։
3. Բացի կողոպուտից, տնտեսագիտական ու տրամաբանական ոչ մի բացտրություն չունի գազի մեծածախ և մանրածախ գների ահռելի՝ 2 անգամ տարբերությունը։
4. Տնտեսագիտական ու տրամաբանական ոչ մի հիմնավորում չունի բնակչությանը եւ խոշոր սպառողներին տրվող գազի մանրածախ գների տարբերակումը հօգուտ օլիգարխների՝ մանավանդ սոցիալապես անապահով հսկայական զանգված ունեցող երկրի պայմաններում։
5. Ռուսաստանի կողմից գազի մեծածախ գնի իրականում ոչ մեծ (մոտ 10 դրամ) բարձրացումը հեշտությամբ կարող է փոխհատուցվել՝ լուծվելով այն գերշահույթների մեջ, որոնք երկար ժամանակ ստացել եւ այսօր էլ ստանում է Հայռուսգազարդը։

Հանրային ծառայությունների կարգավորման հետ կապված մեխանիզմները մանրամասն ներկայացված են Կոնգրեսի «100 քայլ» ծրագրում։ Տվյալ դեպքում հրատապ անհրաժեշտություն է՝ ստուգել «ՀայՌուսգազարդի» իրականացրած ծախսերի հիմնավորվածությունը, մասնավորապես՝ ղեկավար անձնակազմի աշխատավարձերի մեծությունը, ներկայացուցչական ծախսերը, կորուստների իրական տոկոսը , գնումները, ֆինանսական միջոցների տնօրինումը։

Գազի գինը չպետք է բարձրանա։

Հայ Ազգային Կոնգրեսը համապատասխան հայցով մտնելու է դատարան՝ վիճարկելու այդ որոշման ընդունման իրավական եւ տնտեսական ապօրինի հիմքերը։ Միաժամանակ համապատասխան միջնորդություն է ներկայացվելու գազի գնի բարձրացման որոշման կատարումը կասեցնելու, մինչեւ հայցի քննության ավարտը։ Մենք անպայման հաջողության կհասնենք, եթե որպես համահայցվոր հանդես գան ՀՀ հազարավոր քաղաքացիներ, ում շահերն այս որոշմամբ անտեսվում եւ ոտնահարվում են։ Ուստի կոչ ենք անում բոլորին՝ միանալ այս նախաձեռնությանը։
01.03.2010

ՀԱՅՏԱՐԱՐՈՒԹՅՈՒՆ

Վերջերս ռուսական «ՎԵՐՍԻԱ» եւ «ՎԵԿ» էլեկտրոնային պարբերականները ներկայացրել են Հայաստանի նախկին եւ ներկա մի շարք պաշտոնյաների ունեցվածքի մասին ընդարձակ հրապարակումներ՝ համապատասխան ցանկերով։ Ըստ հիշյալ պարբերականների, այդ մարդիկ մի քանի տասնյակ միլիոնից մինչեւ մի քանի միլիարդ դոլարի կարողություն կուտակել են միմիայն պաշտոնեական դիրքի չարաշահմամբ, քանզի բիզնեսի հետ եւբեւէ պաշտոնապես կապ չեն ունեցել։ Ավելին՝ որպես հարստության կուտակման աղբյուր նշվում են նաեւ ավելի ծանր հանցանք ենթադրող գործողություններ, ինչպես՝ նարկոբիզնեսը, տրաֆիկինգը, փողերի լվացումը, միջազգային ահաբեկչության հետ կապը եւ այլն։

Դրանով հաստատվում են Համաժողովրդական շարժման - Հայ Ազգային Կոնգրեսի հանրահավաքներում ու պաշտոնական փաստաթղթերում տրված գնահատականներըերկրի բարձրագույն պաշտոնյայի գլխավորությամբ Հայաստանում ձեւավորված եւ առ այսօր գործող կոռուպցիոն կողոպտիչ համակարգի մասին՝ հաստատված 1999 թ. հոկտեմբերի 27-ի հետեւանքով։ Պարզ ընչաքաղցության սահմանագիծը վաղուց անցած այդ կողոպուտի ահռելի չափերն ու իրականացման մեթոդներն այլ բան չեն, քան ողջ մի ժողովրդի ազգային ու մարդկային արժանապատվության ցինիկ ոտնահարում, նրան նետված լկտի մարտահրավեր։ Հենց թալանչիների կողմից ժողովրդից կողոպտված ունեցվածքի հրապարակված այդ ցանկերի տակ են թաղված հարյուրավոր սպանությունները, հարյուր հազարավորների կործանված ու խեղված ճակատագրերը, չկազմված ընտանիքները, չծնված երեխաները, կիսատ թողնված ուսումը, հայրենազրկումը, չարքաշ կյանքի արմատները։ Վերջին հաշվով, հենց այդ ցանկերի տակ պետք է փնտրել նաեւ մարտիմեկյան սպանդի իրական դրդապատճառները, Հայաստանի պետականության քայքայման ու Լեռնային Ղարաբաղի գոյությանն սպառնացող առարկայացած վտանգները, Ցեղասպանության արդեն իրականացված խայտառակ ուրացումը։

Ահա այդ մարդկանց անունները՝ ըստ հրապարակումների հաջորդականության. Ռոբերտ Քոչարյան, Սերժ Սարգսյան, Հովիկ Աբրահամյան, Տիգրան Սարգսյան, Երվանդ Զախարյան, Սաշիկ Սարգսյան, Գրիշա Հարությունյան, Արթուր Բաղդասարյան, Արմեն Գեւորգյան, Դավիթ Հարությունյան, Վարդան Այվազյան, Գագիկ Խաչատրյան, Սուրեն Խաչատրյան, Հարություն Փամբուկյան, Ալեքսան Հարությունյան, Բագրատ Սարգսյան, Անդրանիկ Մանուկյան։
Արդ, հարցեր են առաջանում.
1. Այս հրապարակումները իրավական իմաստով հաղորդագրություններ են կատարված ծանրագույն հանցագործությունների մասին՝ սկսած պաշտոնեական դիրքի չարաշահումից մինչեւ միջազգային ահաբեկչության օժանդակություն. ինչո՞ւ դրանք առ այսօր հանրապետության իրավապահ մարմինների արձագանքին չեն արժանացել։
2. Ինչո՞ւ առ այսօր այդ պաշտոնյաներից եւ ոչ մեկը դրանց որեւէ կերպ չի արձագանքել, ինչո՞ւ որեւէ մեկը դատարան չի դիմել իր «բարի համբավն արարտավորելու» կամ «զրպարտության» հայցով։ Դա չի՞ վկայում է, թե նրանք դրա դեմ որեւէ ասելիք չունեն։
3. Ինչպիսի՞ն կլիներ այսօր Ղարաբաղյան խնդրի լուծման տարբերակը, եթե այս ցանկում առաջին տեղն զբաղեցնող Ռ. Քոչարյանի կողոպտած 4 միլիարդ դոլարի մի մասը ծախսված լիներ Լեռնային Ղարաբաղը բնակեցնելու նպատակով։
Կոռուպցիոն համակարգն իրավական մեխանիզմներով կարող է կազմաքանդել միայն համաժողովրդական շարժմամբ ձեւավորված լեգիտիմ իշխանությունը։ Սակայն մինչ այդ, այս պահին, Հայ Ազգային Կոնգրեսն առաջարկում է՝ Փաստահավաք խմբի օրինակով ստեղծել Հայ Ազգային Կոնգրեսի եւ իշխանության հավասար ներկայացուցչությամբ հանձնաժողով, որը կուսումնասիրի սույն հրապարակումներում ներկայացված փաստերը։

Հայ ազգային կոնգրես
01.03.2010

Երթ, հարձակում, ձերբակալություն, նստացույց, երթ, հարձակում, ձերբակալություն

Մեկնաբանություններն ավելորդ են...

Վերջին վհատվողը

Ծեծի է ենթարկվել Թեղուտի պաշտպանության խմբի ակտիվիստը

Ս.թ. հունվարի 20-ին ժամը 20:00-ի մոտակայքում Թեղուտի պաշտպանության խմբի ակտիվիստ Վարդան Հովհաննիսյանը բռնության է ենթարկվել մի խումբ ոստիկանների կողմից: 

Նալբանդյան փողոցում նրան մոտեցել են սևազգեստ տղամարդիկ, սկզբում մեկ հոգի, այնուհետև ևս չորսը: Նրանք հարցրել են, թե ինչ էր անում

Վարդանը բակում: Վերջինս պատասխանել է, թե բակում ընդհանրապես չի եղել: Դրանից հետո նրան քաշքշելով փողոցից հեռացրել են դեպի բակ և հայհոյելով հարվածներ հասցրել: 

Այս ընթացքում Վարդանը զանգահարել է 102` ոստիկանություն, և այդ ժամանակ միայն ահաբեկիչներն ասել են, որ իրենք ոստիկաններ են, իսկ նրանցից մեկը ներկայացել է որպես ոստիկանության փոխգնդապետ և ցույց է տվել իր վկայականը: Երբ Վարդանը հայտարարել է, որ կզանգի փաստաբանին, ոստիկանները հեգնել է, թե`«ուզում ես պրեզիդենտի ապարատ զանգի»: Իսկ հետո որոշել են, թե իբր նրան շփոթել են ուրիշի հետ և բաց են թողել: 

Նշենք, որ զանգից մի քանի րոպե անց 102-ից հետ են զանգել Վարդանին, հարցրել թե ինչպես է և խնդրել ներկայանալ բաժին: Ոստիկաններից հենց նոր տուժած Վարդանը չի վստահել ոստիկանությանը և հրաժարվել է գնալ բաժին, այլ պահանջել է, որպեսզի ոստիկանության ծառայողներն իրենք գան դեպքի վայր: 

Նշենք, որ հաջորդ օրը hունվարի 21-ին, «Հետք»-ի լրագրողներից մեկը զանգահարել է ոստիկանություն մանրամասները ճշտելու համար, որին վերջիններս պատասխանել են, որ նման դեպք իրենց մոտ չի գրանցվել:

Այս միջադեպը Թեղուտի պաշտպանության խմբի անդամների նկատմամբ հետապնդումների միակ դեպքը չէ, սակայն առաջին անգամ է, որ ֆիզիկական բռնություն է գործադրվում ակտիվիստի նկատմամբ:

Մենք դատապարտում ենք վերջերս լայն տարածում գտած բռնություններն ու հետապնդումները ակտիվ դիրքորոշում ունեցող քաղաքացիների նկատմամբ: Պահանջում ենք ՀՀ պատկան մարմիններից անհապաղ քայլեր ձեռնարկել և վերջ տալ ոստիկանական ամենաթողությանն ու անպատժելիությանը:

Կոչ ենք անում բոլոր ակտիվիստներին հարձակման ենթարկվելու դեպքում 102-ի փոխարեն անմիջապես զանգահարել 103` շտապ օգնություն, 104` գազի ծառայություն, կամ գոնե 101` հրշեջ ծառայություն:


Թեղուտի պաշտպանության շարժում, 21.01.2010

ԳԱԼԱ-յի ակցիան միացել է նաև ՀԻՄԱ-ն

ԳԱԼԱ հեռուստաընկերությունը բողոքի ակցիա է անցկացնում՝ ընդդեմ Նիկոլ Փաշինյանի նկատմամբ կայացված դատավճռի
	Տեղեկացնում ենք, որ Նիկոլ Փաշինյանի նկատմամբ կայացրած դատավճռի դեմ ԳԱԼԱ հեռուստաընկերության բողոքի ակցիան շարունակական: Ժամը 21:00-ից 22:00-ն ընկած ժամանակահատվածում հեռուստաընկերությունը դադարեցնում է բոլոր տեսակի հաղորդումների հեռարձակումը՝ եթերում թողնելով միայն Նիկոլ Փաշինյանի լուսանկարը
եւ բողոքի ակցիային միացած անհատների ու կազմակերպությունների անունները: ԳԱԼԱ հեռուստաընկերությունը պատրաստ է նաեւ եթերաժամ տրամադրել ազատ արտահայտվելու իրավունք եւ ցանկություն ունեցող բոլոր անձանց: Անհատներն ու կազմակերպությունները բողոքի ակցիային միանալու իրենց ցանկությունը կարող են հաստատել՝ հաղորդագրություն ուղարկելով tvgala@mail.ru էլեկտրոնային հասցեով:

Շտապ... Հայտարարություն

Մեծամասնական ընտրակարգով թիվ 10 ընտրատարածքում ս.թ. հունվարի 10-ին կայացած ընտրությունների արդյունքները բողոքարկելու գործընթացը հանդիպել է վարչախմբի կողմից կանխամտածված կազմակերպված խոչընդոտի: Այսօր` հունվարի 21-ին լրանում է փաստաթղթերը ՍԴ ներկայացնելու վերջնաժամկետը, իսկ Նիկոլ Փաշինյանի փաստաբանները օրվա ընթացքում որեւէ կերպ չեն կարողանում գտնել նրա գտնվելու վայրը` համապատասխան փաստաթղթերն ստորագրելու համար: ԱԱ մեկուսարանից նրանց պատասխանել են, թե Ն. Փաշինյանին տեղափոխել են Նուբարաշենի մեկուսարան, ինչը որեւէ հիմնավորում չի կարող ունենալ: Սա ընդամենը համապատասխան բողոքը ՍԴ ներկայացնելուն խոչընդոտելու մանր ժուլիկություն է` նկատի ունենալով, որ խնդիրը պետք է լուծվի ժամերի ընթացքում: Մենք պահանջում ենք անմիջապես հնարավորություն տալ փաստաբաններին Ն. Փաշինյանի հետ հանդիպելու ու փաստաթղթերն ստորագրելու համար:

ՆԻԿՈԼ ՓԱՇԻՆՅԱՆԻ ՆԱԽԸՆՏՐԱԿԱՆ ՇՏԱԲ
21.01.2010

Նիկոլ Փաշինյանի հայտարարությունը

 Նիկոլ Փաշինյանն այսօր հանդես է եկել հայտարարությամբ:

Երեւանի Կենտրոն եւ Նորք-Մարաշ համայնքների առաջին ատյանի դատարանի դատավոր Մնացական Մարտիրոսյանը 2010 թվականի հունվարի 19-ին իմ դեմ հարուցված քրեական գործով մի այնպիսի դատավճիռ կայացրեց, որն արտառոց է նույնիսկ Հայաստանի Հանրապետության կոռումպացված եւ խամաճիկային դատական համակարգի համար:

Մասնավորապես`

- մեղադրող կողմը դատարանին միջնորդել էր ՀՀ Քրեական օրենսգրքի 316-րդ հոդվածի առաջին մասով («Իշխանության ներկայացուցչի կամ նրա մերձավոր ազգականի նկատմամբ կյանքի կամ առողջության համար ոչ վտանգավոր բռնություն գործադրելը կամ դա գործադրելու սպառնալիքը») ինձ դատապարտել 2.5 տարվա ազատազրկման: Դատավոր Մնացական Մարտիրոսյանը այս հոդվածով ինձ արդարացրեց` հռչակելով իմ անմեղությունը:

- մեղադրող կողմը դատարանին միջնորդել էր ՀՀ Քրեական օրենսգրքի 225-րդ հոդվածի առաջին մասով («Զանգվածային անկարգություններ կազմակերպելը») ինձ դատապարտել 6 տարվա ազատազրկման: Դատավոր Մնացական Մարտիրոսյանը այս հոդվածով ինձ դատապարտեց 7 տարվա ազատազրկման: Այսինքն, 225-րդ հոդվածով ինձ մեղավոր ճանաչելով, Մնացական Մարտիրոսյանը ավելի խիստ պատիժ նշանակեց, քան նույնիսկ միջնորդել էր մեղադրող Կորյուն Փիլոյանը, մի գործելակերպ, որ հայաստանյան դատաիրավական պրակտիկայում հազվադեպ է:

Մնացական Մարտիրոսյանի կայացրած դատավճիռը հերթական անգամ ապացուցում է իմ դեմ հարուցված քրեական հետապնդման քաղաքական բնույթը: Խամաճիկային դատարանը, հանցագործ դատախազությունը, ապօրինի իշխանությունները, ի սկզբանե որոշելով ինձ բանտում պահելու մասին, չեն կարողացել համաձայնության գալ դա իրականացնելու մեթոդաբանության հարցում: 316-րդ հոդվածով դատարանն ինձ արդարացրել է միմիայն արդարադատության իմիտացիա ստեղծելու նկատառումով:

Մնացական Մարտիրոսյանի կայացրած դատավճռի անբարո եւ ապօրինի բնույթը հիմնավորվում է նաեւ հետեւյալ զուտ իրավական հանգամանքներով, որոնք հիշատակում եմ ընդամենը արձանագրելու համար.

- դատարանում չի հետազոտվել որեւէ փաստ, որն ապացուցեր 225-րդ հոդվածի առաջին մասով իմ մեղավորությունը: Մեղադրող կողմի ներկայացրած առանց բացառության բոլոր «ապացույցները» եղել են շինծու, մտացածին, եւ այս հանգամանքը բացահայտվել է դատաքննության ընթացքում: Եւ չնայած ՀՀ Սահմանադրության հոդված 21-ը սահմանում է, որ «մեղադրյալը պարտավոր չէ ապացուցել իր անմեղությունը: Չփարատված կասկածները մեկնաբանվում են հօգուտ մեղադրյալի», իմ պաշտպանները եւ ես դատարանին ենք ներկայացրել իմ անմեղությունն ապացուցող բազմաթիվ ապացույցներ, որոնք, փաստորեն, արհամարհվել են դատարանի կողմից:

- դատարանը հաշվի չի առել ՀՀ Քրեական դատավարության օրենսգրքով ամրագրված նախադեպային իրավունքը. Մարտի 1-ի դեպքերի առնչությամբ հարուցված քրեական գործի շրջանակներում 225-րդ հոդվածի առաջին մասով խամաճիկային դատարանի կողմից մեղավոր ճանաչված բոլոր քաղաքական հալածյալները դատապարտվել են առավելագույնը 5 տարվա ազատազրկման:

- Մնացական Մարտիրոսյանը զլացել է նույնիսկ դատավճռով արձանագրել ինձ համար նշանակված պատժաչափի կիսով չափ կրճատումը, որը սահմանված է ավազակապետական ԱԺ-ի կողմից ընդունված տխրահռչակ համաներմամբ, որն իրավական պարտադիր ուժ ունի դատարանի համար, եւ որի կատարումը տվյալ դեպքում դրված է հենց դատարանի վրա:

Ելնելով վերը նշվածից, հայտարարում եմ`

1. Իմ նկատմամբ ծայր առած հետապնդումը պատվիրված է ՀՀ-ում իշխանությունը բռնազավթած ավազակախմբի եւ անձամբ նախագահի պաշտոնը յուրացրած Սերժ Սարգսյանի կողմից եւ զուրկ է որեւէ իրավական հիմնավորումից:

2. Որեւէ սպառնալիքի ներքո չեմ ընկրկի հանցավոր իշխանության, բեսպրեդելի եւ լկտիության առաջ. հանուն արդարության, օրինականության, ժողովրդի իշխանության հաստատման, խոսքի ազատության, մարդու իրավունքների` պայքարելու եմ մինչեւ վերջ, անկախ նրանից` բանտում կլինեմ, թե ազատության մեջ:

Հայաստանի Հանրապետության ազատասեր քաղաքացիներին կոչ եմ անում հետեւողականորեն շարունակել պայքարը` Հայաստանի Հանրապետությունը բռնազավթած ապօրինի քրեաօլիգարխիկ իշխանությունների հեռացման եւ Հայաստանում օրինական իշխանության հաստատման համար:

Մեր Շարժումը անկասելի է, մեր հաղթանակը անխուսափելի է. պայքար, պայքար մինչեւ վերջ:

ՆԻԿՈԼ ՓԱՇԻՆՅԱՆ

Քաղբանտարկյալ

"Երեւան-Կենտրոն" ՔԿՀ-ից

19.01.2010

7 տարի Նիկոլին (Դատավորը 6 տարին դարձրեց 7)

7 տարի Նիկոլին

Նիկոլ Փաշինյանը քիչ առաջ դատապարտվեց 7 տարվա ազատազրկման :

Դատարանը 316-րդ հոդվածով արդարացման դատավճիռ կայացրեց: Փաշինյանը մեղադրվում էր 2008-ի մարտի 1-ին զանգվածային անկարգություններ կազմակերպելու (225-րդ հոդված) եւ իշխանության ներկայացուցչի նկատմամբ բռնություն գործադրելու մեջ (316-րդ հոդված)

Մեղադրող կողմը 8 տարվա ազատազրկում էր պահանջել:Մանրամասներն ավելի ուշ:

Դատավորը 6 տարին դարձրեց 7

Դատավոր Մնացական Մարտիրոսյանն այսօր 7 տարի ազատազրկման դատապարեց «Հայկական ժամանակ» օրաթերթի գլխավոր խմբագիր Նիկոլ Փաշինյանին: Դատավոր Մարտիրոսյանի վճիռն աննախադեպ էր. փաստորեն նա ավելի խիստ պատիժ պահանջեց Փաշինյանին, քան պահանջել էր մեղադրող կողմը: Մեղադրող Կորյուն Փիլոյանը Քր. օր 316 հոդվածով Փաշինյանին պահանջել էր ազատազրկման դատապարտել 2,5 տարով, իսկ Քր. օր 225 հոդվածով` 6 տարով:

Մնացական Մարտիրոսյանը այսօր Փաշինյանին անմեղ ճանաչեց Քր. օր. 316 հոդվածով, իսկ Քր.օր 225 հոդվածով մեղադրողի պահանջած 6 տարին դարձրեց 7 տարի: Մնացական Մարտիրոսյանը չհասցրեց ավարտել վճռի հրապարակումը, երբ դատարանի դահլիճից լսվեցին «անամոթ», «դավաճան», «պատվեր կատարող» վանկարկումներ:

Նախքան Նիկոլ Փաշինյանի դատավճռի հրապարակումը այսօր դատարանի բակը շրջապատված էր ոստիկանների բազմությամբ, որոնք Հայ ազգային կոնգրեսի ներկայացուցիչներից շատերին այդպես էլ թույլ չտվեցին ներս մտնել դատարան: Հավաքվածներից շատերը հույս ունեին, որ դատավոր Մարտիրոսյանն այնուամենայնիվ արդարացման վճիռ կկայացնի: «Անկեղծ ասաց, հավատում էի, որ մարդ է, խիղճ կունենա, այդքան ծախու չի կարելի լինել: Անմեղ մարդուն դատելը մարդասպանությանը հավասար հանցագործություն է»,- «Ա1+»-ին ասաց Կոնգրեսի համակիր Օֆելյա Մարգարյանը:

Այսօր ընդդիմության առաջնորդներից դատարանում էր նաեւ ՀԺԿ նախագահ Ստեփան Դեմիրճյանը: «Հստակ պատվեր կատարվեց: Այսինքն, ամեն գնով ուզում են Փաշինյանին պահել անազատության մեջ: Սա խայտառակ դատավարությունների շղթայի մեկ օղակն էր, իսկ մարտի մեկի իրական մեղավորները դեռ ազատության մեջ»,-ասաց նա: Հունվարի 10-ի թիվ 10 ընտրական տեղամասում ընտրությունների արդյունքները այլ լինելու դեպքում, այսօր Փաշինյանը վճիռը կարո՞ղ էր այլ լինել. «Ա1+»-ի հարցին` պարոն Դեմիրճյանն ասաց. «Ընտրությունների արդյունքներն այլ չէին կարող լինել»:

Փաշինյանին այսօրվա դատավճիռը Կոնգրեսի ներկայացուցիչ Դավիթ Շահնազարյանը գնահատեց մեկ արտահայտությամբ` քաղաքական պատվեր:

Նախկին քաղբանտարկյալ Ժիրայր Սեֆիլյանի համար դատարանի վճիռն անակնկալ չէր. «Մեր երկրում արդարադատություն չկա, դրանք բոլորը քաղաքական որոշումներ են: Սա հերթական անօրինությունն է, հերթական հանցագործությունն է, որի համար անկասկած պատասխան են տալու»:

Այսօր դատարանում էր նաեւ ԿԸՀ-անդամ Զոյա Թադեւոսյանը, որը խոստովանեց, որ արդարացման վճիռ էր սպասում. «Ի վերջո արդար մարդուն դատելը ծանր գործ է: Ես պասում էի արդարացում, հատկապես երբ առաջին հոդվածով Նիկոլին արդարացրեցին: Բայց դատեցին արդարությունը, արդարադատությունը դատեց արդարությունը, դատեց ազնիվ մարդուն, դատեց մեր պայքարը, դատեց մեր երկրի ապագան, մեր երեխաներին, մեզ բոլորիս դատեց: Այսօր մենք բաց երկնքի տակ ենք, բայց այսօր մեզ բոլորիս դատեցին»,- ասաց տիկին Թադեւոսյանը:

Նիկոլ Փաշինյանի փաստաբանները «Ա1+»-ին հայտնեցին, որ պատրաստվում են բողոքարկել դատավճիռը, թեեւ որեւէ ակնկալիք չունեն:

Դատավճռի հրապարակումից հետո մի քանի ժամ Նիկոլ Փաշինյանի համակիրներն ու Կոնգրեսի ներկայացուցիչները դատարանի բակում էին եւ վանկարկում էին. «Սերժիկ հեռացիր», «ամոթ», «մարդասպաններ», «մարդակերներ»: Չնայած անձրեւային եղանակին ոստիկաններին չէր հաջողվում ցրել հավաքվածներին: ՊՊԾ հրամանատար Ռոբերտ Մելքոնյանի իր ենթականներին այսօր հրահանգեց պատ կազմել եւ մարդկանց բազմությանը հրելով հեռացնել դատարանից: Հավաքվածները հայտարարեցին, որ դատարանից չեն հեռանա, քանի դեռ Նիկել Փաշինյանին չեն տարել, եւ այդպես էլ արեցին:

Աղբյուրը` Ա1+

Նիկոլ Փաշինյանի հայտարարությունը

«2008 թվականի Մարտի 1-ի հետեւանքները հաղթահարելու, օրինականության, հանդուրժողականության մասին ճամարտակող կոալիցիոն իշխանությունը 2010 թվականի հունվարի 10-ին Երեւանի թիվ 10 ընտրատարածքում տեղի ունեցած ԱԺ պատգամավորի ընտրություններում սպասելիորեն ցուցադրեց, որ հավատարիմ է 2008 թվականի Մարտի 1-ի իր գործելակերպին: Քվեարկությունը զուգորդվեց խայտառակ բռնություններով, սպառնալիքներով, ընտրակեղծիքներով, ընտրական տեղամասի անժամանակ փակմամբ, եւ այս գործընթացները տեղի էին ունենում ընտրությունների օրինականությունն ապահովելու պարտավորություն կրող պետական մարմինների ուղղակի կամ անուղղակի հովանավորության պայմաններում: Արդյունքում մենք հերթական ապօրինի եւ կեղծված ընտրությունների ականատեսը դարձանք:

Հունվարի 10-ի քվեարկությունը ցույց տվեց, որ ինչպես 2008 թվականի Մարտի 1-ին, այնպես էլ հիմա, իշխանությունը պատրաստ է դիմել ցանկացած բռնության ՀՀ քաղաքացիների ազատ կամարտահայտությունը թույլ չտալու, քաղաքական պրոցեսների լեգիտիմությունը բացառելու, իշխանությունը քրեածին խմբավորումների ձեռքում պահելու համար: Ըստ այդմ, մարտիմեկյան տրամաբանությունը շարունակում է դրված լինել իշխանության եւ ժողովրդի հարաբերությունների հիմքում, եւ գործող իշխանության հենարանը բռնությունն է, քրեական ամենաթողությունը, ՀՀ քաղաքացիների անպաշտպանությունն ու հուսահատությունը: Այս ամենը ապացույցն է այն բանի, որ 2008 թվականի նախագահական ընտրություններից ի վեր ներքաղաքական կյանքի օրակարգը որեւէ փոփոխություն չի կրել, եւ դեռ այն ժամանակ ի հայտ եկած քաղաքական հարցերի լուծումը շարունակում է առաջնահերթություն մնալ Հայաստանի համար:

Որպես հունվարի 10-ի ընտրություններին մասնակցած Աժ պատգամավորի թեկնածու, ցավում եմ, որ չեմ կարող շնորհավորել նախնական արդյունքներով հաղթող ճանաչված անձին, նաեւ այն պատճառով, որ նույնիսկ ընտրական տեղամասեր այցելած քաղաքացիների ճնշող մեծամասնությունը չեն ճանաչում նրան:

Պատկերացնում եմ, թե հունվարի 10-ին ինչպիսի ծանր օր են անցկացրել Հայ ազգային կոնգրեսի ներկայացուցիչները, ակտիվիստները, իմ նախընտրական շտաբի անդամները եւ ինչպիսի հիասթափություն են ապրել ընտրությունների ընթացքին եւ նախնական արդյունքներին ծանոթանալով: Հատկապես այս ֆոնին ուզում եմ ընդգծել, որ մեր պայքարի արդյունավետության գրավականը շարունակականության մեջ է, շարունակականություն, որտեղ հուսահատությունն ու ոգեւորությունը տեղ չունեն: Երկար տարիներ շարունակվող պայքարում մենք մեր պարտքն ենք կատարում Ապագայի, Ազատ եւ Երջանիկ Հայաստանի առաջ, եւ այս պայքարում որեւէ ընկրկում հավասարազոր կլինի դավաճանության: Մենք պարտավոր ենք Հայ ազգային կոնգրեսի, Հայաստանի հիմնադիր-նախագահ Լեւոն Տեր-Պետրոսյանի առաջնորդած սկզբունքային պայքարը տրամաբանական ավարտին հասեցնելու կամք եւ հետեւողականություն դրսեւորել:

Սույն հայտարարությամբ նաեւ շնորհակալություն եմ հայտնում:

- բոլոր այն քաղաքացիներին, ովքեր ազատորեն իրենց կամքը արտահայտելու համար հունվարի 10-ին այցելել են ընտրական տեղամաս:

- իմ նախընտրական շտաբի եւ ենթաշտաբների անդամներին, ովքեր արտակարգ պայմաններում առավելագույն ջանքեր ներդրեցին ընտրությունների օրինական ընթացք ապահովելու համար:

Սրտագին ուղերձ եմ հղում Հայ ազգային կոնգրեսի երիտասարդներին, ակտիվիստներին ովքեր իրենց ուսերին են կրել իմ նախընտրական քարոզչության ողջ բեռը. Գլուխներդ բարձր, դուխներդ տեղը: Դուք այն Վեմն եք, որի վրա կառուցվելու է Ազատ եւ Երջանիկ Հայաստանը: Մեր ընթացքը անկասելի է, մեր հաղթանակը անխուսափելի է: Պայքար, պայքար մինչեւ վերջ»:

ՆԻԿՈԼ ՓԱՇԻՆՅԱՆ
Քաղբանտարկյալ
«Երեւան-Կենտրոն» ՔԿՀ-ից
11.01.2010